Suniba: Tirak nu au nodi koguli

Uhu’: Tirak nu au nodi koguli

Sinuat di: Daxter Dany

Koposik oku mantad id nipiku, gumogor po do sogitan osougi tongus kosuabon. Au oku no daa koopud do tumungang tu oinggolou kopio tulu ku. Baino, kolimo no toun do au osukup todop ku tu ogumu kopio koomburingot pomusarahan. Songulun oku no do poingion hiti walai. Sundung pia do, haro tulun hilo walai sampaping nga au asaru do kopiboros. Baino sumuab oku po do mosik tu nopupusan nodi koundarangan sikul om gumuli nodi mongia’ id sikul SK. Ragkam Tambunan. Pogulu mamanau mongoi kalaja inum oku po do kupi miampai ruti hilo id pandatan do walai. Maso minum kosorou oku di maso tanganak po. Ontok dii, osuab po om posikan oku no di tina mongoi pongisu om makan do kosuabon tu osuab po om mamanau no mongoi sikul.

Kukukuuhuk... Ka manuk om koposik oku nopo mantad id sorou ku. Kaai po i tinumon ku, ongoi oku no podsu om panandasuk sumodia’ mongoi id sikul. Kopongo po papanaho kuno i korita. Atuk! Olumis tomod ilo Nulu Kinabalu kangku do nokokito maso id tindalanon. Suusuai no kokitanan nulu id kosuabon diti tu timpuunan nogi sidangan do tadau. Soira nokito ku ii, kosorou ku kawagu maso di tokoro po. Maso dii asaru yahai angatan di koduo molohing dahai do tumakad. Id tindohuon oimpa nogi kolumison dilo nabalu. Sundung pia do, oudipon do tumakad om ogumu po kagawu limatok id ralan nga au monguro tu aramai tomod soira korikot id sulap.

            Korikot oku po id dumbangan do sikul om intangai ku posorili. Alanggang po hiti tu monoroiso nogi tanganak om mongingia’ dii nokorikot. Suang oku nodi id linimput mongingia’ om osodu po mingis-ngigis no i luguan mongingia’. Kopisanangan doungosuab mongingia’ Dell, ka disio. Kopisanagan nogii, kangku do sinumimbar. Ngaran nopo do luguan mongingia’ dii nga i Alexson om pisan ku nogi isio.  Nunu nimaan ku ontok koundarangan sikul? Ka kawagu disio do minonguhot nga pakadaada oku no. Soira nokito disio ii, ngingis nopo isio tu karati no nu id pomusarahan ku. Angatai oku nodii disio minongoi inum hilo id kantin daamot magandad kotimpuun o’ kalas.  

            Piipiro minit mantad dii, songinrikot nodi ngawi tanganak om mongingia’ dii suai. Oimpa dahai yolo mantad id kantin. Au alaid mantad di kokito oku songulun tapa pinapaatod tanak disio minongoi id sikul. Osuau tomod yolo, sopirak-irak po. Sikog ka do kosorou ku dilaid id maso timpuun nogi mongoi sikul. Osodu panahon dahai mongoi sikul om kotolunan po kawagu. Soira do oudipon mihad oku nondo nga, singunon oku nondo di tapaku do mamanau. Osorou ku po pason disio do iya no ponongkosukud dahai somonu om mingoos no kama do balajal. Koturu nopo romou mato ku soira nokosorou pason disio.

            Kriing! Ponguni no i lunsing panakatanda do tumimpuun no kalas. Pogisuusuhut no yahai duo di luguan mongingia’ mongoi id linimput mongingia’ maganu buuk Boros Kadazandusun id mija’ ku. Sumuang oku kalas BKD toun 3 do kosuabon baino. Maso id kalas songirak-irak po i tanganak do mogisisimbongol tu alaid no au nokopiruba. Suang oku nopo id kalas nga kadaada nopo ngawi i tanganak om timpuuno’ ku no o’ kalas. kopongo do mongia’ kalas di om sumuang no kagu kalas do suai gisom ii nopupusan timpu do baino. Aramai no kopio do baino tu koruba kumaa toinsanan tanganak om haro nogi piipiro tanganak wagu i kosusuang id sikul diti.

            Ontok jam koduo do sosodopon, nopupusan nodi sikul norikot no timpu do muli. Sumuang oku nogi do korita kagagang oku soira nokorongou giak om tihad tanganak. Panangkus oku nopo minongoi pogintong om kokito ku do poinloub no tapa di tanak i nokito ku kosuab maso id kantin. Luguan mongingia’ om mongingia’ suai nga nokorikot nogi. Uhupo no diolo do mangangkawot ii tapa pinoposuang id korita ku om pootodo kuno hilo lamin pongusapan. Mihad-ihad po i tanak id sampaping do tapa disido. Id tindalanon kosorou ku nopo ngawi oinsanan kinantakan taraat id koposion ku maso limo toun di nakatalib. Ontok dii, asapou kopio o’ rasam nga minamanau kasari yahai mongoi id walai di pisan ku i ii Alexson tu haro abaabayan. Oinsanan yahai sampaganakan kaampai no di tadi, tapa om tina ku sinumakai id korita. Id ralan sikog ko do kotompisal om kasambalik ii korita pinapanau ku. Kopuriman oku po om hilo no lamin pongusapan. Oinsanan paganakan di suai au no milo uhupon. Mihad om monosol oku nga aiso no guno. Mantad dii, osongulunan oku om iti no kinotimpuunon do asaru oku au koodop do totuong gisom limo toun.    

            Korikot po hilo id lamin pongusapan rikot no ii dokutul minoi ponguhup dahai. Tanak nopo di tapa dii nga kakal po do mihad. Umbalan kuno daa monginsasamod nga au kasari otingkod. Ogirot kopio longon disido do sumambayang. Au oku nokopuriman do koturu romou mato ku kokito do tanak di. Au alaid mantad di korikot no tama di tanak. Oposi-posi po isido do mihad-ihad. Kosuang podi ngawi yolo id lamin pongusapan om uli nogi yahai. Kosuabon dii, maso id sikul kaanu oku habar do kitoruol tuundu-undu ii tapa di tanak nga momoogot nodi. Monongkotoluod oku kumaa Kinorohingan tu nonuan po isio do kosiwatan miampai tanak om sawo disio.

            Mantad dii, koukab no ginawo ku do monorimo otongkiadan tulun ii koupusan ku. Kopuriman oku do oinsanan i poimpasi, alaid toi ko’ oruhai gumuli kasari kumaa di Kinorohingan. Soira nopupusan kalas ontok tadau dii, ongoi oku no ruba tapa dii tanak om tilombus kinumaa id lobong paganakan ku id suai hilo id kampung. Polombuso ku nopo oinsanan suang ginawo miampai tihad. Sundung po do, au oku no kokito tirak dokoyu nga kakal kou po id suang ginawo ku. Pason ku kumaa toinsanan, do papagaras ginawo sundung pia ogumu kobolingkangan id koposion tu natantu no ngawii ii do Kinorohingan.