Sinuat: Daxter D.
1.0 Pogintutunan
Pondidikan nopo nga iso impohon kumaa
koposion di osonong om dinamik. Pondidikan diti nogi popotontu do ralan om kowoowoyon
koposion do sosogulun. Pondidikan di kibagas kaanu momolodi’ do tinaru dii kikowowoyo
di agaras om abantug. Oponsol kopio tonggungan do pondidikan Malaysia montok
momolodi’ sumolusuk wagu. Ii nopo tu tulun Malaysia manahak sokodung kumaa
koimogoton ekonomi, sosial, koubasanan om politik id pogun diti. Mantad dii,
oilaan do pondidikan koponguhup momolodi’ mamasok di haro sandau di
osonong, osulimbang, om osombulu mantad intelek, koimanon, om
jasmani. Oponsol nogi iti do monguhup manamong boros tina tokou maya koosilan
Kurikulum Boros Kadazandusun Sikul Tosiriba.
2.0
Pionitan Falsafah Pondidikan Kabansaan
om Dasar Pondidikan Kabansaan miampai Kurikulum Standard Sikul Tosiriba i ponokoimpohon kopoosilan kurikulum
Boros Kadazandusun Sikul Tosiriba.
Falsafah pondidikan kabansaan sinupu
ontok toun 1988 om nosorisid kawagu ontok toun 1996. Suang nopo do FPK nga, “Pambalajalan
id Pogun Malaysia nopo nga' iso' tinggisaman di potilombus montok
popoburu' sawi-awi' potensi do tososongulun om nogi' montok momolodi' do
songulun di osulimbang om osinonod id intelek, korusadan, ginua' ginawo
om kotinano', poinsondot nogi' o kotumbayaan om kotunjukan kumaa
Minamangun. Pingisaman diti kituduan do momolodi' tinaru Malaysia di
kitoilaan, kilompu', kiwoyo' tolinuud, kitonggungan om koimau do momodimpot
kohingkangan koposion om kaanu manakadai id kotoonongon om kopuawangan do
paganakan sondii', tinaru om pogun.”
Sumusuhut,
Dasar Pondidikan Kabansaan nopo nga nokotimpuun mantad Penyata Razak (1956) i
poinsuang id Ordinan Balajaran (1957). Ontok toun 1960, nintaangan
kawagu om kaasil nodii Laporan Rahman Talib i pinosuang id Akta Pelajaran
(1961). Ontok toun 1979, sinoruyuk kawagu Dasar Pondidikan Kabansaan do
iso’ Puruan Karbinet. Ponoriukan nopo diti nga montok moginsonong kapadalanan
dau moi do kaasil iso booyungan di mii’iso, katanud kooturan om momogonop lokis
tulun i kikaabalan montok mamangampot kotundaan pogun. Mantad do
ponoriukan di, nokoimbulai Akta Pendidikan 1996 ii kitudu do
ka’anu monguhup sistom pondidikan papaasil booyungan Malaysia abaal id
toilaan, kaba’alon om woyo toluud i gunoon id pomogunan di mogisogulu om kiwoyo
global bagas mantad koburuon sains, teknologi om kopoilaan.
Suumusuhut,
tumanud di Noriati A. Rashid et. al. 2016 om
Roslawati Binti Baharom et.
al. 2015, Kinotimpunan Kurikulum standard sikul
tosiriba (KSSR) diti nopo nga ontok toun 1983 i roitan do kurikulum wagu sikul
tosiriba, (KBSR) om insangan no kagu id toun 1993 i rinoitan do kurikulum
bersepadu sikul tosiriba. Sorisido’ kagu iti id toun 2003 sabab do Dasar
pongia’an om pambalajalan Sains om Matematik id suang Boros Inggeris. Id toun
2011 sinorisid kagu KBSR diti om kosiliu nodi do Kurikulum Standard Sikul
Tosiriba (KSSR) maya do Palan Induk Koburuon Pondidikan 2006-2010 (PIPP).
Pionitan
nopo diti kointalang kopio tumanud Kementerian Pendidikan Malaysia id buuk
Dasar Pendidikan Kebangsaan edisi keempat. (2017) Kapamansayan Dasar Pondidikan
Kabansaan nopo nga poingsangkad toi ko’ sumuku do Falsafah Pondidikan Kabansaan.
Dasar pondidikan Kabansaan (DPK) nopo nga oponsol kopio sabaagi monguhup
koponuridangan dimpoton pogun maya pondidikan montok sumiliu iso pogun
di oburu mantad aspek koburuon ekonomi, ka’adangon sosial, ginaras korusadan,
moral om etika moi do momolodi’ booyungan di mii’iso, demokratik, liberal om
dinamik. Kurikulum standard Sikul Tosiriba (KSSR) nopo nga kiniguas do FPK om
DPK ii kidimpoton papaasil songulun di osulimbang, kipomusaran kreatif,
kritis om inovatif maya do tunjang komunikasi, sains om teknologi, koburuon
koinanao’ om estetika, koimatuan, kotulunan, om korusadan, koulalaho om woyo’. Mantad
di oilaan do pionitan nopo do FPK, DPK om KSSR nga elemen-elemen id suang FPK i
nopokoimpohon do kapamansayan DPK. Montok mamagampot hizad FPK mingisom o’ KPM
sabaagi monunupu DPK diti montok karalano kapadalanan oinsanan dasar ii
pinadalin do Jabatan Pondidikan Pogun (JPN) om Pejabat Pondidikan
Watas (PPD) sabaagi popoburu dasar id bontuk buru tonudon montok mamagampot
ponguridangan dasar i nowonsoi. Oponsol kopio kowowoyo oinsanan naayatan KPM,
ii boogian, JPN, PPD om luguan mongingia’ id sikul. Oinsanan ii kopionit do KPM
oinaba maganu tinggisaman momiri, monoriuk, mangarati, monginmuai om popoburu oinsanan
karalano kapadalanan dasar i maan wonsoyo. FPK om DPK diti nopo kawagu nga impohon
montok hizab kapamansayan KSSR.
3.0 Ponuangan
kurikulum id Kurikulum Standard Sikul Tosiriba manahak kogorisan do Kurikulum
Boros Kadazandusun Sikul Tosiriba.
Tumanud Kementerian Pendidikan Malaysia.
(2014) id Draf Kurikulum Standard Sikul tosiriba BKD Toun 6, ponuangan
kurikulum nopo nga iso' poingkawasan kawawagu id ponginabasan koilaan om
oponsol do onuan kapanatalan tu iti no kabaalan di koponguhup do tangaanak id
koposion diolo tikid tadau om id ponginabasan toilaan. Ponuangan kurikulum diti
nopo nga miagal do kabaalan momusorou, kabaalan balajal karaaralano’ balajal,
kabaalan momoguno teknologi koilaan om piromutan, woyo toluud om sunduan
mamasok, mogisuai-suai koporokisan, kopogonuan toilaan, monindapu’,
kreativiti, om kabaalan momusorou taang takawas (KBAT).
Oinsanan
ponuangan kurikulum diti kapanahak do kogorisan kumaa kurikulum Boros
Kadazandusun Sikul Tosiriba. Sabaagi poomitanan, id Standard Pambalajalan
nokosuang o’ kabaalan momusorou di okritis om okreatif mooi do kaanu o
tangaanak do monolibamban kobolingkangan, kaanu maganu kootuson om kaanu
popolombus do koilaan di kotunud kokomoi isoiso’ ahal miampai momoguno
boros di efektif. Suumushut, kabaalan balajal karaaralano’ balajal.
Kabaalan diti kiguno mooi do kitonggunan tangaanak id pambalajalan
diolo. Poingamung id kaabalan diti do kabaalan balajal om kabaalan
maganu koilaan montok popotounda do tangaanak monginobos koilaan di
potilumbus. Kotolu, kabaalan momoguno teknologi koilaan om piromutan.
Kabaalan nopo diti nga iso’ kabaalan id abab ko-21. Poingamung ngawii o
kabaalan momoguno kakamot multimedia miagal do komputer momonsoi om
momoguno kalaja sikul om mogikaakawo koilaan mantad multimedia miagal do
mongintong dokumentari id television om maganu koilaan mantad internet. Suai ko
mantad dii, kaanu nogi tangaanak do kosiwatan papaatod om monorimo do e-mel,
mamalayag piromutan elektronik montok mogihum om papatayad koilaan om milumaag
miampai tulun suai maya piromutan sosial miagal do Facebook, Instagram om
Twitter.
Ponuangan kurikulum di
kaapat nopo nga, woyo toluud om sunduan mamasok. Oponsol do pasandadon
o woyo toluud miagal do woyo guminawo pogun sondii om kopurimanan sunduan
mamasok id kurikulum Boros Kadazandusun mooi do awangun o tangaanak di kiwoyo
om oupus kumaa pogun sondii. Kolimo, Mogisuai-suai koporokisan. Id suang
Standard Pambalajalan okito nogi o koponoina’an do koporokisan tangaanak
di mogisuusuai. Okito iti id suang do Standard Pambalajan, miagal do
kopoina’an koporokisan kinestetik maya' aktiviti di noulud id Standard
Pambalajalan Kabaalan Kolumison Boros. ko’onom, Kopogonuan Toilaan. Id mato
palajalan diti pohontolon o koilaan di naanu mantad mogikaakawo gana' miagal do
gana' Sains om Teknologi, Geografi, Sejarah, Koilaan Konsumerisme om Kousinan.
Suai ko' mantad diti, montok ponuangan boros aanu nogi mantad surat abal om
isu-isu timpu baino.
Ponuangan kurikulum di
koturu nopo nga, mongindapu'. Iti nopo nga mooi do kaanu tangaanak monoguang
karaaralano' koposion timpu baino om popoburu' koposion tangaanak id elemen
pongindopuan miagal ko' kreativiti, inovasi om inisiatif di toponsol
posunudon kopio kumaa tangaanak. Kawalu nopo nga, kreativiti ii kiwoyo' do popokito
kabaalan momonsoi isoiso' toinaon i au po insan nowonsoi do tulun suai maya
imaginasi di tosonong. Soira kaanu tangaanak do papabanta asil kalaja di
okreatif, okito do koimbulai kaanangan do tangaanak, kotumbayaan
sondii om kopuriman do kounsikahan montok kinalantayan diolo sondii.
Tohuri kabaalan momusorou taang takawas (KBAT) i oilaan sabaagi momoguno
toilaan, kabaalan om woyo' toluud moi do kaanu monolibamban
kobolingkaangan soira maganu kootuson om kiwoyo' inovasi om kikogisaman montok
momudali' isoiso' asil. Kabaalan nopo di poingamung id KBAT diti nga miagal do
kabaalan momoguno, kabaalan mongumpori, kabaalan manahang om kabaalan monupu’.
4.0
Panahangan Linimput Balajalan
(PLB) (Pentaksiran Bilik Darjah) maya Kurikulum
Boros Kadazandusun Sikul Tosiribo (KBKDST) monguhup
tangaanak popoingkawas kabaalan boros id Boros Kadazandusun.
Tumanud
Kementerian Pendidikan Malaysia mantad laman web diolo panahangan
linimput balajalan nopo nga iso panahangan di pootilombus id
suang pongia’an om pambalajalan montok maganu koilaan kokomoi koimogoton,
koburuan, komilaan om kinogompoton tanganak sikul. Panahangan linimput balajalan
nopo nga maya formatif om sumatif. PLB roitan do panahangan sikul (PS)
nokotimpuun id toun 2011 nga ontok 2016 nosimban kumaa Panahangan
Linimput Balajalan (PLB).
Oponsol kopio panahangan linimput balajalan
diti tu koponguhup mongingia’ do mongilo koimogoton tanganak sikul maya
poimponu, mongintutun kagarasan om koluhoyon tanganak
id suang pambalajalan, mongilo bagas pongia’an, mamalan om monimban
ralan pongia’an, om maganu laang suumusuhut dii osikap. Padalanon Panahangan
Linimput Balajalan maya proses pongia’an om pambalajalan
poingompus id sontoun maya pogintaan, ponuatan om lisan maya do timbaba’, kuiz,
pabantaan om suusuai po abaabayan pongia’an i poingimpou do Standard Prestasi
om pomusarahan professional mongingia’. Pomusarahan profesional (pertimbangan
profesional) nopo nga iso’ bontuk kinoutusan mionit do pambalajalan
tanganak sikul i winonsoi do mongingia’ maya kiwoyo momoguno toilaan, kaba’alon
om nawawayaan poingimpou Standard Prestasi om data koimogoton ponguasaan
tanganak id pambalajalan.
Poruputon o’ panahangan linimput balajalan
diti induo sontoun momoguno do templat poruputan id pail excel
ii guno’on id soliwan talian. Luputan diti guno’on id taang sikul om poluputon
kumaa tanganak sikul om molohing diolo. Gatang id panahangan linimput balajalan
diti milo potilumbuson maya piuhupan puru momoruan sikul do mongintong,
om tongomongingia’ id suang panitia toinsanan mato balajalan papaharo
pogibabarasan kokomoi karalano om instrument panahangan di guno’on. Mongingia’
id suang puruan nogi nga mogiboboros momonsoi pomusarahan abaal kumaa tanganak
sikul. Okito poomitanan templat poruputan id pail excel id siriba.
Tadon:
Sumber pendidik. (2017) https://bit.ly/37vthfw
Panahangan linimput balajalan
diti koponguhup popoingkawas kabaalan tanganak sikul id Boros Kadazandusun. Ii
nopo mantad PLB diti kaanu mongingia’ mongilo koimogoton tanganak sikul maya
poimponu, mongintutun kagarasan om koluhoyon tanganak id suang pambalajalan.
Suai ko ii, kaanu mongingia’ mamalan do iso ralan wagu poingkuro moginsonong
ralan kopongia’an moi do agampot ii dimpoton. Sabaagi poomitanan, id boros
kadazandusun kokito mongingia’ do kagarasan om koluhoyon miampai koimogoton
tanganak sikul id suang kabaalan do mokinongou om moboros, mambasa’ om
monuat. Mantad dii, mogiboboros
tongomongingia’ om mogihum ralan di lobi kibagas montok moginsonong kabaalan
ngawi dilo.
5.0
Pomolingkuman