INUS ID PONDIDIKAN

Sinuat: Daxter D.

1.0 Pongintutunan

Inus id pondidikan kaampai no do inus visual, inus muzik, om inus koguyuon. Inus id pondidikan au sumuku do gana inus suai miagal do teater, inus sastera, inus fotografi om inus manamong tinan. Inus id pondidikan id taang diti lobi popohontol do aspek korotian, ponginmuaian om komi. Kapadalanan dii mogintong topurimanan estetika om kreativiti sosongulun maya pomolohisan intuisi, persepsi, imaginasi om konsepsi tanganak. Mongingia’ monguhup tanganak papadalan do ababayan montok momuka, momurimon om popoimbulai topurimanan pancaindera.

2.0 Teori pambalajaran, konsep om elemen Inus id pondidikan.

2.1.1 Teori pambalajaran

Kiwaa piipiro teori om taba i kosokodung do inus id pondidikan kiguno id timpu tanaru. Koiso nopo nga, teori konstruktivisme Lev Vygotsky (1895-1935) ii nogi impohon kumaa teori konstruktivisme sosial. Tumanud tumanud di Lev Vygotsky koimogoton konsep tanganak obontuk maya sistematik, logikal om rasional maya koponguhupan om ponokotuduk verbal mantad tulun suai. Oruhangan o toilaan maya interaksi om ampayat do ponokotuduk tulun di lobi abaal. Suai ko ii, koimogoton tulun kaampayat nogi mantad sosial om koubasanan. (Noriati A. Rashid, Boon Pong Ying, Sharifah Fakhriah Syed Ahmad. 2017). Suai ko ii, tumanud di Lev Vygotsky, id teori koburuon kognitif Vygotsky id suang Wong Kiet Wah, Wong Kiet Wah, Mohamad Isa Azis, Rafidah Ruhani (2016) i pinopointanga do tolu ideo toponsol miagal do Internalization, Scaffolding, om zon koimogoton proksimal.  

                       I.        Internalization- iso proses id nonggo sosongulun popiiso tangabaabayan sosial i nawayaan id iso proses kognitif.

                      II.        Scaffolding- iso dingkai ii monokodung proses pingsingilaan sosogulun.

                    III.        Zon Koimogoton Proksimal- Ii kirati do agampot iso koimogoton kognitif di lobi akawas soira haro ponguhupan mantad tulun di agayo toi ko’ lobi abaal.

            Suai ko ii, tumanud nogii di teori kopogisuaian koporokisan Howard Gardner (1983) id suang Mook Soon Sang (2010) pinopointutun isio do turu’ kawo do koporokisan i mositi haro id sosongulun tanaganak. Koturu-turu koporokisan nopo diti nga ointutunan do koilaan verbal, mongintob, abaal momoguno do panandatan, visual liwang kasarahan asosiatif, pomusarahan logikal, om persepsi tosiau. Ii nodii, sokiro iso’ no ponginsamakan i guno’on id suang pongia’an, haro tanganak dii au kaanu mangarati nu i potudukon mongingia’ tu mogiisuusuai kabaalan monindu’ do tanganak id sikul. Ponginsamakan di mogikaakawo koporokisan monguhup koponorimaan pomusarahan tanganak moi do lobi okreatif. Ontok toun (1991) nokoboros i Howard Gardner do haro walu koporokisan id sosogulun miagal do koporokisan linguistik, logikal-matematikal, liwang, muzik, tinan kinestetik, interpersonal (sosial), intrapersonal (kendiri), om naturalis. Sabaagi pomolingkuman, teori Howard Gardner popokito do oinsanan tanganak haro mogikaakawo koporokisan id tinan diolo om koporokisan diti au miagal id oinsanan tanganak.

Teori di kotolu, teori hoka hoki tumanud di Roger Sperry om Herman (1998-1991) nokoboros do abaagi tutok kumaa apat boogian. Boogian nopo diti nga, logik Analitik fakta, holistik intuitif koisaan sintesis, pengelolaan kouludon paracangan om kosuahon kinestetik topurimanan ginua’ ginawo. Montok hoki (gibang) lobi kumaa matematik logik, boros, monuat, mambasa’, linear siri om analisis. Montok do hoka (wanan) lobi kumaa koinsanan, imaginasi, kreativiti om sintesis. Suai ko ii, ka Herman id suang ‘quadrant concept’ Iinus koponguhup pomusarahan di rasional om intiutif do sosongulun. (Zubir, S. K. M. 2015; Ioan Moise Achim et. al 2013; Edward Loduni)

2.2.1 Konsep

            Konsep toi ko’ korotian nopo do Inus id pondidikan nga, kitonggungan inus id pondidikan montok koburuon tanganak maya koingkawasan persepsi, estetika om kreativiti. Hizab nopo do inus id pondidikan diti nga papaasil sosongulun di kikoubasanan tumanud pomusarahan koinusan, kiginawo kreatif, inovatif, inventif om kiwoyo di osonong. Piomungan tolu kawo do inus i kaampai do inus visual, inus tuunion om inus koguyuon koponguhup do pombontukan sosogulun i kiwoyo holistik.

            2.3.1 Elemen Inus id pondidikan

            Suumusuhut, kiwaa piipiro elemen inus id pondidikan. Elemen-elemen diti nopo nga kaampai no do inus visual, inus koguyuon, om inus muzik. Id suang inus visual i popohompit do linukis, inus koguyuon popohompit pomogunaan liwang id ababayan, om inus muzik lobi id interprestasi sosongulun kumaa muzik di norongou. Wotik, loyuk om koguyuon nopo nga elemen i toriirimo koitalang di posorili do tanganak. Maya diti kaanu tanaganak mingsingilo kokomoi posorili diolo miampai kohiok om kibagas. Unsubon nogi tanganak do mongumbal om momuka ahal wagu maya ponguhupan do mongingia’ sabaagi do mongunguhup.  

3.0 Kopomogunaan do teori pambalajaran, konsep om elemen Inus id Pondidikan id tema 2 ‘winoun toilaan’ id pangajaran om pambalajaran Boros Kadazandusun sikul tosiriba toun 3.

Pangajaran om pambalajalan id sikul tosiriba nopo nga sumuku do dokumen standard kurikulum om pentaksiran (DSKP). Id tikid pangaan toi ko’ toun id suang kurikulum Boros Kadazandusun nopo nga nowonsoi maya ralan di spesifik om nouludun. Buuk teks nopo nogi nga sinuat tumanud DSKP montok monuang kosusukupan kurikulum tu ii no o kakamot di gunoon id pongia’an om pambalajalan. Id buuk teks Boros Kadazandusun toun 3 nopo nga atalang kopio o kopomoguna’an inus pointongkop monikid tema om unit. Id tema 2 ‘winoun toilaan’ kaampai no piipiro unit miagal do, pomoinan, tuunion, padsakayan om tanom posorili.

Rajah 3.0

Tadon: Buuk Bahasa Kadazandusun Tahun 3

            Unit nopo id tema 2 di koiso’ nga, pomoinan. Ii nopo nga iso’ uhu’ di agayo pionitan kumaa inus koguyuon id pondidikan. Osonong kopio uhu’ diti montok pongia’an tu, tumanud teori konstruktivisme pomoinan koponguhupun tanganak momonsoi iso toilaan wagu id koposion diolo. Id teori Howard Gardner nopo nokosuang pomoinan id iso koporokisan i nosokodung nogi id teori hoka hoki. Montok isoiso pomoinan oguno koduo-duo boogian tutok hoka om hoki tu haro aktiviti toi ko’ gura om kiwaa kopomoguna’an toilaan matematik id piipiro pomoinan. Poomitanan haro abaabayan ii kaampai kabaalan mongintob. Miagal do mogintob mata toi ko’ point id isoiso ababayan. Suai ko ii, id unit diti nogi haro pionitan do inus visual. Poomitanan, id rajah 3.2 momonsoi do longkudi mantad kalatas di mogisuusau wotik, watang kayu di tokoro, selotep, guting, gam om pinsil. Suai ko mantad dii, inus muzik nogi nga kaampai nogi. Poomitanan, id isoiso pomoinan haro sinding ii guno’on montok popohiok dii ababayan.

           

 

 

 

 

                                             Rajah 3.1                        Rajah 3.2

Rajah 3.3

Tadon: Buuk Bahasa Kadazandusun Tahun 3

Suumusuhut nopo unit limo i kiuhu’ tuunion. Ii nopo nga iso roromu id toponsol om agayo id inus. Tuunion diti agayo pionitan kumaa inus muzik om poinsuang id teori hoka hoki om Howard Gardner ii kokomoi koporokisan muzik. Mantad pongia’an om pambalajalan diti kaanu tanganak mongintutuon inus do muzik maya do kakamot tuunion. Suai ko ii, inus koguyuon nogi nga kaampai nogi soira haro ababayan sumayau tumanud do muzik. Suai ko mantad dii, kohompit inus visual id unit diti maya iso’ timbaba’ i monuhu tanganak momonsoi kakamot tuunion. Poomitanan, id rajah 3.5 nosuhu tanganak do momonsoi do replika tagung momoguno do polositik, gaam, gunting, kalatas kiwarana om warana.

 

        

 

 

 

 

                                          Rajah 3.4                               Rajah 3.5

Tadon: Buuk Bahasa Kadazandusun Tahun 3

Tohuri, montok unit onom om turu i kiuhu’ do padsakayan om tanom posorili. Id unit diti okito kopio kopomogunaan kotolu-tolu inus id pondidikan. Poomitanan okito id rajah 3.6 kopomoguna’an inus visual tu nosuhu tanganak momonsoi iso poster i kohompit do uhu’ padsakayan. Suai ko ii, montok unit turu i kiuhu’ do tanom posorili haro pionitan do inus muzik. Poomitanan, miagal id rajah 3.7 siriba osuhu tanganak popolombus do sinding ‘tanom koupusan’. Maso do suminding kohompit nogi inus koguyuon tu, milo nogi miampai gura tinan moi do’ lobi kohiok ginawo tanganak.

 

 

 

 

 

                                                       Rajah 3.6                      Rajah 3.7

Mantad do oinsanan unit id suang tema 2 buuk boros kadazandusun toun 3 diti, oilaan dati do pongia’an om pambalajalan nopo nga ogumu pionitan kumaa teori pambalajan om inus id suang pondidikan. Suai ko ii, pongia’an okon ko poimponu tumanud do buuk teks no. Sabaagi songulun mongingia’ mositi do okreatif papadalan aktiviti pongia’an om pambalajalan di kohiok moi do agampot di tanganak nu ii maan mongingia’ polombuso. Tumanud teori di Howard Gardner (1983-1991) mositi do momoguno ponginsamakan di mogikaakawo koporokisan tu au mogiagal kabaalan monindu’ om momusorou do tanganak. Sokiro nopo au kopio kosudong laang kopongia’an i guno’on do mongingia’ nga apagon tanganak do mangarati. Suai ko ii, oponsol kopio tonggungan mongingia’ tu tumanud teori konstruktivisme Lev Vygotsky id zon koimogoton proksimal, agampot iso koimogoton kognitif di lobi akawas soira haro ponguhupan mantad tulun di agayo toi ko’ lobi abaal miagal do mongingia’.

4.0 Pomolingkuman

            Sabaagi do pomolingkuman, kapamansayan kurikulum id DSKP toun 3 nopo nga kohompit do mogikaawo teori, inus id suang pondidikan om kohompit nogi do tungkus koubasanan om toilaan sandad tinaru Kadazan Dusun. Kopomogunaan do inus, om teori diti koponokodung pongia’an om pambalajalan di kohiok kumaa tanganak. Sabaagi songulun mongingia’ nogi mositi do koilo moginsonong toi ko’ papalaab pongia’an om pambalajalan tumanud kurikulum di nowonsoi. Ii nopo nga moi do orikot dimpoton angkab do dasar pondidikan kabansaan, falsafah pondidikan om suang do oinsanan suang id DSKP.