1.0 Pogintutunan
Id suang kurikulum Boros Kadazandusn noulud
o kabaalan mokinongou, moboros, mambasa’, om monuat montok momodimpot do
hizab om dimpoton mato palajalan diti. Oinsanan pionitan teori, prinsip miampai
strategi, ponginsamakan, kaida, om teknik nopo nga’ oponsol do oilaan
mongingia’ soira mongia’ om momili’ kakamot pongiaan montok popoingkawas
kabaalan komi om mambasa’ id suang pongia’an boros kadazandusun.
2.0 Teori om Prinsip Mambasa’
Kiwaa piipiro teori do kabaalan mambasa’.
Iti nopo nga’ kaampai no do teori mambasa’ bottom-up, up-bottom,
om teori interaktif. Tumanud Harris om Sipay, 1980 id suang Muis, (2013) mambasa’
bottom-up nopo nga’ iso proses pongkodean kawagu do simbol
boroson poinsuat. Mambasa’ diti nogi, iso’ aktiviti monimban simbol
grafik kumaa bontuk boros lisan. Kaanu i mamambasa’ mogintutun do
mogisuusuai lambang linguistik montok monimban bontuk
boros poinsuat kumaa boros lisan. Mantad dii, oponsol kotutun sosongulun dii do
pimato om lambang-lambang id suang kakamot basaon diolo. Sumusuhut,
nopo nga’ teori top-down. Tumimpuun i mamambasa’ do proses
mamarati teks mantad taang di sontob akawas. Mamambasa’ dii, momoguno
hipotesis om monindu’ pogulu maan po’o’tuso maya tasab ponuatan id teks.
Maya kokori toilaan om konsep-konsep i poinsuang do pomusarahan, mamambasa’
momonsoi hipotesis om monindu’ kokomoi nunu i orubaan id suang teks. Suai
ko ii, teori model interaktif nopo nga’ piomungan mantad teori bottom-up
om top-down. Koonuan toilaan id suang model interaktif nopo nga’ nounsub
do nawawayan om toilaan mantad di mamambasa’ om pomoguna’an toilaan wagu
montok maganu rati mantad di binasa’.
Tumanud Dwi Novita, (2007) Kiwaa piipiro prinsip mambasa’ id mositi do intangan mongingia’ pogulu mongia’ yolo do tanganak. Koiso’, mambasa’ nopo nga’ proses momusorou di kompleks. Iti nopo nga’ miagal do mamarati panandatan i sinuat di monunuat, monginterpretasi konsep-konsep monunuat om momonsoi koutuson. Koduo, kabaalan mambasa’ tikid tulun nopo nga’ mogisuai-suai. Faktor nopo do pisuayan diti nga’ umul, kadarakasan, ginua’ ginawo, sosial, tadon om nawawayan, kowowoyon, kosusukupan om ogumu po. kotolu, kapamansayan kotorian mambasa’ nopo nga’ maya panahangan. Kaampat, mambasa’ mositi osiliu do iso’ nawawayan di kosontob ginawo di minambasa’. Kolimo, kabaalan mambasa’ mositi do tumilombus. Koonom, panahangan mambasa’ di kotilombus om komprehensif nopo nga’ iso gompoton id suang kapamansayan rahi mambasa’.
3.0 Strategi,
Ponginsamakan, Kaida om Teknik
Poginsamakan nopo
nga’ laang di onuon montok momonsoi iso wowonsoyon. Id konteks pongia’an konsep
poginsamakan diti kirati do laang moginsomok tudu i pointantu montok pongia’an
om pambalajalan. Tumanud Hashim, Yaakub, Mohd. Zohir (2007) poginsamakan,
kaida, teknik om strategi nopo nga’ oponsol soira mogiboboros tokou kokomoi
pedagogi pongia’an. Ponginsamakan nopo nga’ mositi poingsangkad teori, om prinsip
toi ko’ model di pointontu’. Suai ko ii, ponginsamakan nopo diti nga’ beraksiomatik
tu’ kointalangan nopo dau nga’ otopot om au momoguno do kointalangan om sabab.
Strategi nopo nga’ kirati do kaba’alon momili poginsamakan, kaida om teknik
pongia’an tumanud objektif pongia’an. Iti nopo nga’ lobi kumaa tudu timpu
tanaru om mogintong oinsanan aspek pambalajalan poingampai no do
pomilian kakamot, timpu om susuai po.
Sumusuhut,
kaida pongia’an nopo nga iso laang di guno’on montok papadalan om momoguno
teknik, suang pongiaan om kakamot pongiaan montok mamagampot tudu pongiaan.
Teknik nopo nga’ iso kabaalan toi ko’ laang popoburu kakamot pongia’an kumaa
tanganak mantad laang id suang ababayan pambalajalan. Teknik diti nogi’ nga’
laang paparamit pongiaan om mositi do nimuaian moi do kaanu poposikap
interpretasi tanganak. Tumanud Hashim, et al. (2007) kaida nopo nga’ iso wonsoi
mongingia’ di sistematik i kitudu’ do mamagampot tudu pongia’an di pointatap.
Iti nopo nga’, lobi kumaa timpu toniba om nogi iso goos poimponu’ kaampai do
prosedur poingulud tumanud poginsamakan di pinili’. Kaida diti monokodung
poginsamakan di pinili’. Teknik nopo kawagu nga’, iso kabaalan mongingia’ mongulud
om popoburu kaida mongia’ i pinoburu. Okito kopio iti id suang linimput balajalan.
Suai ko ii, teknik diti nogi’ gunoon id laang pongia’an om mongintong faktor
tadon tanganak montok popotontu’ teknik di piolion.
4.0 Pionitan Teori om Prinsip Kabaalan
Mambasa’ Miampai Strategi, Ponginsamakan, Kaida, om Teknik Pongia’an
Boros Kadazandusun.
Montok mogintong pionitan teori om prinsip kabaalan mambasa’ miampai strategi,
ponginsamakan, kaida, om teknik pongia’an Boros Kadazandusun maganu tokou iso
teori om prinsip mambasa’. Poomitanan, teori mambasa’ bottom-up
i
mositi do karati om kotutun po ii tanganak kokomoi mogisuusuai pimato om lambang
id ponuatan om milo nogi popolombus suang kakamot di binasa’ om manahak
korotian umum kokomoi teks. Mantad teori diti, kopionit o’ prinsip mambasa’
proses momusorou di kompleks tu’ anaaru po laang mambasa’ miagal do
mogintutun po lambang, pimato, tanda basa’ om ogumu po pogulu do karati
kopio do isoiso teks. Sumusuhut, poginsamakan nopo nga’ mositi do tumanud teori
om prinsip. Mantad dii, ponginsamakan nopo di kopionit do teori om prinsip id
sawat nga’ ponginsamakan induktif. Poomitanan, koilo po tanganak maya spesifik
nunu o’ lambang, pimato, om tanda basa’ id teks om koimbulai
nogi’ korotian umum tu’ Induktif nopo diti nga’ kirati do spesifik kumaa umum.
Sumuusuhut, nopo nga’ kaida.
Kaida nopo nga’ mositi kosokodung ponginsamakan di pinili’. Montok pongiaan mambasa’
id suang Boros Kadazandusun kaida nopo di milo gunoon nga’ kaida pambalajalan
koperatif om kolaboratif. Koperatif nopo diti nga’ sumuku kumaa pongia’an i monuhu
tanganak mantad mogisuusuai kabaalan do mogi’u’uhup id iso tinimungan tokoro
montok mamagampot iso dimpoton di miagal. Rati kolaboratif nopo nga’ piuhupan
do duo toi ko’ piipiro tulun montok momonsoi iso’ ababayan. Maso papadalan do
kaida diti mositi do momoguno teknik i kouhup popoburu do kaida. Poomitanan,
teknik di kaanu popoingkawas kabaalan mambasa’ nopo nga’ teknik
manangon. Poomitanan ababayan nopo’ i haro pionitan kumaa prinsip, teori,
poginsamakan om kaida id sawat nga’ miagal do manangon id tinimungan. Laang
nopo kapadalan ababayan diti nga’ boogion do mongingia’ i tanganak kumaa
piipiro tinimungan om onuan do teks tangon. Mantad teks tangon dii suhuon
tanganak mambasa' om popolombus tangon di kumaa tambalut
suai maya tinimungan. Ii suai nopo nga' manahak komi kumaa tanganak di mambasa'
do tambalut diolo. Mantad dii, oguno o’ kaida pambalajalan
koperatif om kolaboratif soira mogiboboros tanganak kokomoi laang kolombusan
teks. Maso do aktiviti diti mositi do poingintong kasari mongingia’ do pibarasan
diolo moi do haro kolaboratif.
Strategi nopo nga’ mantad goos
mogintong om momili’ ponginsamakan, kaida om teknik dii kosudong ii kaanu
popongonop ponginsamakan di pinotontu’. Suai ko ii, strategi diti lobi
mogintong objektif timpu tanaru om mogintong aspek pambalajalan kaampai no do
pomilian, kakamot, timpu om susuai po id pongia’an boros kadazandusun. Strategi
nopo di ginuno montok pongiaan tumanud ababayan manangon id sawat nga’ strategi
poinlongkod do tangaanak tu’ oinsanan ababayan maan wonsoyo do tanganak om
mongingia’ nopo nga’ sabaagi do mongunguhup no. Maya do ababayan diti okon ko’
koingkawas no kabaalan mambasa’ tanganak nga’ koingkawas nogi kabaalan
komunikasi om manahak komi.
5.0 Momohuyad Prinsip Pomilian om
Adaptasi Kakamot Pongiaan Montok Popoingkawas Kabaalan Komi om Mambasa’
Tumanud DSKP Boros Kadazandusun,
kabaalan mokinongou om moboros nopo nga' iso' kabaalan di touhai montok
literasi. Ii nodii poogi' do unsubon o tangaanak do minsingilo om momoguno do
woyo' mokinongou di kotunud. Unsubon o tagaanak do tumimpuun do minsingilo do
moboros mantad taang popolombus do tuni pimato di kotunud om kumaa nogi'
do popolombus do boros, frasa om gisom no do kaanu popolombus do panandatan
di pointunud, oulud om olinuud montok mogikaakawo kohuboyoon. Sumusuhut, oponsol
kabaalan mambasa' moi do kaanu o tangaanak popolombus tuni pimato montok
pomoroitan Boros Kadazandusun.
Kiwaa
piipiro prinsip pomilian om adaptasi kakamot. Koiso nopo nga’ kakamot di
kosudong. Tumanud
Mahnun, (2012) kakamot pongiaan nopo dii pinili’ nga mositi kosudong kumaa hontolon,
dimpoton om tudu do pongia’an. Sumusuhut, kakamot nogi’ diti kopionit miampai
ponginsamakan, kaida om teknik pongiaan, kinantakan tanganak, kowowoyo’on
pongia’an, om rahi tanganak. Iti no sabab oponsol mongingia’ popotontu’ do
tudu pongia’an pogulu momili’ do kakamot. Soira kotontu’ o’ tudu
dii, kaanu nogi’ do momili kakamot di kagampot tudu pongia’an. Suai ko
ii, maso momili’ kakamot pongia’an di kosudong intaan nogi’ do mongingia’
kinantakan tanganak tu’ tumanud Wong, et al. (2016) mogisusuai tadon nawawaayan
sosial, pondidikan, ekonomi, fizikal, ginua’ ginawo, om kognitif
tanganak. Kakamot i kosudong montok piipiro tanganak oduya au kosudong montok tanganak
suai.
Prinsip pomilian om adaptasi kakamot di kumoduo
nopo nga’, mositi id taang takawas.
Id suang proses pongia’an mositi do haro piipiro konsep i intaan miagal do
pamagayat, pomusarahan, om kowowoyo’on. Tumanud Othman,
& Kassim (2017) kakamot id taang takawas nopo nga’ kounsub tanganak do
momusorou om tumilombus do mingsingilo’. Sokiro nopo do, asaasanang o’ aktiviti
id pongia’an nga’ ababasan tanganak do balajal tu’ au yolo ounsub do
momusorou. Mantad dii, oponsol do koilo mongingia’ taang kaabalan komi om mambasa’
tanganak pogulu momili’ do kakamot pongia’an. Kada huliton kabaalan di abaal no
tanganak sokiro aiso pomoruhangan nga’ simbanan nogi’ moi do apapaagon
timbaba’ dii. Poomitanan, sokiro abaal no o’ tanganak do mambasa’
om popolombus teks, milo mongingia’ do momoruhang kaabalan mokinongou id
ababayan dii. Poomitanan, papadalan mongingia’ ababayan mambasa’ suniba id
kalas momoguno slide powerpoint di kohiok om pokitonon momoguno LCD.
Pogulu suhuon tanganak mambasa’ do teks suniba dii miampai loyuk diolo
sondii. Soira opongo iri maan mongingia’ pounio audio kolombusan
di kotunud om suhuon kawagu tanganak mambasa’ tumanud kolombusan om
loyuk dii bobos kotunud ii orongou diolo mantad audio dii. Maya ababayan diti okon
ko kabaalan mambasa’ no nga’ kaampai nogi’ kaabalan popolombus
boros momoguno loyuk di mogisuusuai. Mantad dii, koingkawas noda kabaalan komi
om mambasa’ do tanganak.
Kotolu
prinsip pomilian om adaptasi kakamot mositi koontok toi ko’ otindu. Tumanud
Salim, Mansur, & Utama. (2020) tinindu
kakamot pongiaan kirati do koontok kumaa koulaalaho tanganak, laang balajal
om suang kakamot pongiaan i tumanud suang kurikulum pongia’an. Mantad dii,
kakamot pongiaan di pinilion mositi kopionit kumaa aspek hontolon pongia’an
kabaalan komi om mambasa’. Tinindu isoiso kakamot kumaa kurikulum
pongia’an boros nopo nga’ tumanud suang pongia’an miampai kotorian om gaab
tanganak, kouludan kakamot, om koilaan toi ko’ fakta. Suai ko ii, tumanud Salim, et al. (2020) milo nogi’ gunoon iso
model ii roitan do model ASSURE montok momili kakamot pongia’an di
koontok. Maya model diti manganalisis o’ mongingia do tanganak, manahak tudu
pongia’an, momili’ media, momoguno kakamot, mogintong tisuli’ mantad tanganak,
om manahang om mogintong kagu proses pongia’an. Mantad kopomogunaan model diti,
au nodaa kasala’ mongingia’ momili’ kakamot pongiaan tu’ kointalang no ngawi
aspek i mositi haro id suang kakamot pongia’an dii.
Kaampat, prinsip om adaptasi mamangayat rahi
tanganak. Kakamot nopo di kaanu mamangayat rahi do tanganak nga’ mositi do
kohiok. Tumanud Chotib, (2018) kakamot di kohiok haro pionitan kumaa inus id
pongia’an miagal do inus visual, koguyuon om tuunion. Poomitanan, kakamot pongia’an
miagal do vidiu Youtube i winonsoi mongingia’. Soira mongia’ do kaabalan
komi om mambasa’ pointongon ii tanganak do vidiu kokomoi boogian tinan.
Id suang vidiu diti haro inus visul miagal gambal kiwotik, inus tuunion
miagal tuni tulun mimboros om inus koguyuon ii monuhu tanganak id kalas di do
mingkakat om mongigit boogian tinan tumanud ponuhuan do vidiu. Suai ko ii, oilaan tokou do kogumuan tanganak
diti orohian tomod do mamain vidiu game. Mantad dii, kosudong tomod o’ pomogunaan
aplikasi Scratch id proses pongiaan om pambalajan. Scratch
nopo diti nga’ iso aplikasi di koponguhup do mongingia’ momonsoi iso vidiu game
tumanud kreativiti diolo. Poomitanan, soira momonsoi do vidiu game maan do
mongingia’ potosolo’ kabaalan mambasa’ miagal do mambasa’
ponuhuan, om kabaalan komi miagal do mokinongou om moboros tumanud do ponuhuan
id suang vidiu game dii.
Kolimo, kakamot
di pillion om maan adaptasi mositi do omura om praktikal. Sokiro momili’ do
kakamot pongiaan osonong daa do wonsoyon sondii mongingia’ kakamot di momoguno
kakamot ii haro id posorili toi ko’ i milo gunoon kagu tumanud kreativiti diolo.
Sumusuhut, kakamot i gunoon id suang proses pongiaan om pambalajalan
mositi do praktikal kumaa mongingia’ om tanganak. Kakamot diti osoonong do
guno’on, atahan om milo simbanan soira mongia’ topik suai. Suai ko
monguhup popoingkawas kabaalan komi om mambasa’, kakamot pongiaan di
winonsoi sondii nogi’ manahak poomitanan di osonong kumaa tanganak do manamong
posorili. Poomitanan, kakamot pongiaan ii milo wonsoyon nopo nga’ miagal
ababayan ‘kutak ponguhatan’. Kutak ponguhatan diti kaasil mantad iso kutak i au
no gunoon om kalatas i maan tulisai do ponguhatan id suang Boros Kadazandusun.
Laang nopo do momonsoi do kakamot diti nga’ luangan id kutak om suangan do
ponguhatan i milo kuoton tanganak toi ko’ mongingia’ maso proses pongiaan. Au
apagon mamarati proses pongiaan diti nga manahak bagas om kohiok kumaa
tanganak. Kabaalan mokinongou nopo nga’ aanu soira mokinongou tanganak do
ponuhuan mongingia’. Kabaalan mambasa’ nopo nga’ naanu soira suhuon
tanganak mambasa’ do ponguhatan id kutak om kabaalan moboros aanu maso manahak
yolo sisimbar toi ko’ tisuli kumaa ponguhatan di abasa’ diolo.
6.0 Pomolingkuman
Sabaagi pomolingkuman, proses pongia’an om pambalajalan
nopo nga’ iso proses di kompleks. Montok momodimpot
do hizab om dimpoton do isoiso mato balajalan toi ko’ kabaalan id pongia’an
kaampai oinsanan aspek miagal do teori, prinsip miampai strategi,
ponginsamakan, kaida, om teknik montok momili’ kakamot pongiaan ii koponguhup momodimpot
hotolon pongia’an dii.