Koburuon Komoi Boros om kodolinan id Boros Kadazandusun miampai tantaman di otoguangan id timpu dumontol.

SUANG

KATAYADAN GAMBAR OM PETA.. ii

1.0 KOPOINTUTUNAN.. 1

2.0 KOBURUON KOMOIBOROS OM KODOLINAN ID BOROS KADAZANDUSUN.. 1

2.1 KOMOIBOROS ID BOROS KADAZANDUSUN.. 1

2.1 KODOLINAN ID BOROS KADAZANDUSUN.. 5

3.0 TANTAMAN DI OTOGUANG BOROS KADAZANDUSUN ID TIMPU DUMONTOL.. 6

POMOLINGKUMAN.. 8

SUKUON.. 9

KATAYADAN GAMBAR OM PETA

Gambar

Gambar 1: Beginner's Dictionary. 2

Gambar 2:  Komiboros Dictionary. 2

Gambar 3: Kadazan-Dusun Malay-English Dictionary. 2

Gambar 4: Kadumalin. 3

Gambar 5: Glosbe. 4

Gambar 6: Blogspot 4

Gambar 7: Suat abal kokomoi goos IPG Kent popoburu BKD id Wikikamus. 4

Gambar 8: Kamus Dusun. 5

Gambar 9: Komoiboros Dictionary Digital 5

Gambar 10: Kadazan Flash Cards Vol 2. 5

Gambar 11: Suat abal kokomoi tonggungan molohing montok manamong boros KDMR.. 8

Gambar 12: Suat abal kokomoi kopogonuan mokiikinobos BKD id IPG

Peta

Peta 1: Sasadan Booyungan Boros Dusunik

1.0 KOPOINTUTUNAN

Etnik Kadazan Dusun nopo nga’ momoboros do boros di bobos agayo id siriba paganakan Dusunik i bobos tagayo id pogun Sabah tumanud koubasanan toi ko’ tradisi. Kinoyonon nopo kopio do booyungan diti nga’ mantad watas Ranau moi id watas Tambunan, Kota Belud, Kota Kinabalu, Penampang om Papar. Suai ko ii, okito nogi’ tulun Kadazan Dusun id suang kaum suai id labus kinoyonon diti. Sumusuhut, Boros Kadazandusun nopo nga’ kaampai mantad subdialek i abaagi kumaa apat subdialek tapangkal miagal do dialek Kadazan Pesisir Pantai i gunoon id Penampang om Papar, dialek Dusun Tengah i gunoon id watas Ranau, Tambunan, om Kota Belud, dialek Monsok i gunoon id Kampung Monsok Ulu, Monsok Tengah, om Kuala Monsok id Tambunan, om dialek Sugut Kadazan i gunoon id Sungai Sugut-Labuk. Dialek Minokok nopo nga’ raan do dialek Dusun Tengah id kinoyonon sulok Kinabatangan. Miagal nogi’ do dialek Dusun Tempasuk ii gunoon do komuniti Dusun Tindal id watas Kota Belud, i poinsuang sabaagi raan dialek Dusun Tengah (Pugh-Kitingan, 2016).

2.0 KOBURUON KOMOIBOROS OM KODOLINAN ID BOROS KADAZANDUSUN

2.1 KOMOIBOROS ID BOROS KADAZANDUSUN

Kalaja komoiboros nopo nga’ montok manahak rati toi ko’ takrif kumaa hogot miampai momoguno hogot-hogot. Id suang do komoiboros minog tokou do manahak rati kumaa isoiso lambang miampai momoguno lambang dau sondii. Lambang nopo diti nga’ lambang linguistik. Ingga teori poimbida montok kapamansayan komoiboros. Montok mongulud komoiboros di osonong minog do guno’on piipiro prinsip miagal do kasandadan, kopongobian, kasagaan, om tadon di haro kasagaan om otorimo guno’on. Suai ko ii, Montok papaasil komoiboros kadazandusun minog do haro proses ponimungan om popisuai boros. Iti nopo nga’ montok mongulud om monompipi data tumanud pimato kalapas do ponimungan data. Id suang do laang diti, maan uludo oinsanan hogot ii notimung tumanud abjad mantad a-z. Owonsoi nogi’ iti maya manual toi ko’ momoguno komputer. Popion o’ data diti id bank data montok koguna’an do timpu dumontol.

            Haro piipiro buuk komoiboros ii nakaasil no montok monguhup tinaru Kadazan Dusun om tulun sompomogunan mangarati om papadalin do boros suai kumaa Boros Kadazandusun toi ko’ Boros Kadazandusun kumaa boros ii guno’on diolo. Sabaagi poomitanan, English-Malay-Kadazandusun beginner’s dictionary i winonsoi di Rita Lasimbang (2009), om Koimoiboros Dictionary Kamus Dusun i pinosoliwan do Sabah Komik Publications (2014), om Kadazan-Dusun Malay-English Dictionary (2015) i winonsoi om ninsanagan kagu do KDCA ii okito id gambar 1, 2 om 3.

Gambar 1: Beginner's Dictionary

‌

Gambar 2:  Komiboros Dictionary

Gambar 3: Kadazan-Dusun Malay-English Dictionary

            Pongokomputeran do boros id boros kadazandusun nopo nga’ notimpuunan no nga’ okuri om au po ogonop ii nokosuang id internet. Suai ko ii, haro nogi’ piipiro kasalaan kokomoi kapanahakan do rati toi ko’ kopodolinan. Oponsol do haro goos montok momogonop om popoingkawas kinoingkokoton do pongkomputeran id Boros Kadazandusun. Id timpu baino, kiwaa nodi kadumalin ii kaanu mamadalin boros malayu kumaa boros kadazandusun toi ko’ boros kadazandusun kumaa boros malayu maya auto. Minagangu o’ tinimungan mononoriuk mantad FKI UMS id siriba Language Engineering and Application Development (LEAD) om Knowledge Technology Research Unit (KTRU) do inisiatif montok papasil iso sistom papadalin Boros Kadazandusun kumaa Boros Malayu toi ko’ Boros Malayu kumaa Boros Kadazandusun. Nowonsoi iti tu’ id timpu diti aiso po sistom ii kaanu papadalin iso panandatan tanaru do Boros Kadazandusun maya automatik suai ko mantad iso’iiso boros mantad komoi boros.  

Sumusuhut haro nogi’ o’ glosbe om blogspot ii poposodia komoiboros id internet. Glosbe diti nogi’ miagal do kadumalin ii koguno do papadalin Boros Malayu kumaa Boros Kadazandusun toi ko’ Boros Kadazandusun kumaa Boros Malayu. Blogspot nopo nga’ montok popoilang piipiro rati boros. Poomitanan nopo do blogspot ii haro nga’ okito id blogspot borostoko ii okito id gambar 5.

Suai ko ii, ontok 11 Milau 2022 pinapaharo o’ Wikimedia Community User Group Malaysia om IPG Kampu Kent, Tuaran do iso Bengkel Wikikamus Bahasa Kadazandusun montok monimung om poposuang Boros Kadazandusun id suang Wikikamus. Goos diti koponguhup do mongingumu sukuon kumaa tulun ginumuan om popoburu komoiboros do boros sandad dati kointalangan program diti okito id gambar 6.  

Gambar 4: Kadumalin

Tadon: https://fkiapps.com/kadumalin/index.php

 

Gambar 5: Glosbe

Tadon: https://ms.glosbe.com/ms/dtp

Gambar 6: Blogspot

Tadon: http://borostoko.blogspot.com/

Gambar 7: Suat abal kokomoi goos IPG Kent popoburu BKD id Wikikamus

Tadon: https://bit.ly/3M5GHE4

Suai ko mantad dii, maya koimogoton teknologi haro nodi ngawi aplikasi komoiboros Kadazandusun id telepon kandai. Aplikasi nopo diti nga’ okito maya aplikasi id suang Playstore. Aplikasi nopo diti nga’ kohompit do Kamus Dusun 2023 i winonsoi do Ell Studio, Komoiboros Dusun mantad Sabah Komik om Kadazan Flash Cards Vol 2 i winonsoi do Kadazandusun Language Foundation miampai sokodung do 20TH KLF Charity Golf Tournament.

Gambar 8: Kamus Dusun

Tadon: https://bit.ly/40dopVG

Gambar 9: Komoiboros Dictionary Digital

Tadon: https://bit.ly/3LLbbLA

Gambar 10: Kadazan Flash Cards Vol 2

Tadon: https://bit.ly/42H7mgw

            Oponsol kopio pongkomputeran do komoiboros diti montok koburuon Boros Kadazandusun om tulun ginumuan. Poomitanan, koponguhup iti id proses pangajaran om pambalajaran. Maya do kinoburuon pongkomputeran diti, osoonong nodi tangaanak om mongingia’ mogihum rati boros sundung amu mongigit do buuk komoiboros di tagayo mooi id linimput pambalajalan. Suai ko ii, ointutunan nogi’ o Boros Kadazandusun id sompomogunan tu’ haro nodi longkod ponimungan data do Boros Kadazandusun. Mantad dii, otolibamban nodaa kobolingkangan kokomoi kodolinan om pogihuman rati id boros koupusan dati diti.  

2.1 KODOLINAN ID BOROS KADAZANDUSUN

Kodolinan nopo nga’ iso proses popoundaliu isoiso boros tadon kumaa boros oontokon. Tudu kodolinon nopo nga’ mooi popionit tulun id iso tinimungan i dwiboros toi ko’ multiboros. Tumanud di Slype id suang Bagu et. al. (2019), okito kodolinan id aspek koubasanan sabaagi iso kapangalanan teks ponuatan id boros tadon kumaa boros ontokon om popotosol piagalan rati i okito. Id aspek pomusarahan moden, kodolinan nopo nga’ iso koumaan do popoundaliu mesej i naanu mantad boros ontokon. Popotosol nogi o ahal diti do piagalan id aspek tonsi mesej, ekspresif, konotatif, metalinguistik om puitis.

            Tumanud Wuryantoro (2018), haro duo rati do proses kodolinan miagal do suang rati okikip om suang rati alaab. Proses kodolinan suang rati okikip nopo nga’ proses padaadalin maganu kootuson montok papadalin teks boros tuod kumaa boros oontokon. Suang rati alaab nopo nga’ proses padaadalin montok manganalisis toi ko’ momuhondom teks boros toud, popoundali asil analisis teks boros toud id suang boros oontokon om popionong asil koudolihan mantad teks boros toud id suang boros oontokon montok popisudong kumaa kaida boros oontok moi do otorimo o’ asil kodolinan dii.

            Tumanud Bagu et. al. (2019), haro piipiro impohon soira sumiliu tokou songulun papadalin id boros kadazandusun. Koiso nopo nga’ minog do ogumu toilaan id toud boros om abaal id boros koiso. Mantad dii, minog do abaal tokou kokomoi ekspresi idomatik id toud boros moi do aiso toi ko’ mogingkuri kasalaan id kodolinan om kosiliu do kohouron rati. Koduo, minog do kotorimo toi ko’ i mamaambasa oontok do boros oontok di gunoon. Kodolinan nopo nga’ minog do haro kaalanan kakamot teks id iso boris (toud boros) miampai kakamot boros id boros suai (boros oontokon). Mantad dii, haro duo kawo boros i minog do posuangon id aktiviti kodolinan miagal do toud boros om boros ontokon. Kotolu, mositi do koilo subjek toi ko’ gana i maan podolino. Sundung pia do haro kabaalan id duo boros nga’ au po milo sumiliu papadalin di abaal. Kaapat, minog do koilo padaadalin kokomoi teori om proses kapadalinan tu’ toilaan id teori koponguhup id kopoosilan kodolinan di osonong. Tohuri, minog do kitoilaan i padaadalin kokomoi koubasanan toud boros om boros oontokon. Suai ko ii, minog nogi’ do haro toilaan di subjek toi ko’ gana suai di haro pionitan maya potilombus toi ko’ au potilombus id aspek kodolinan.

3.0 TANTAMAN DI OTOGUANG BOROS KADAZANDUSUN ID TIMPU DUMONTOL

Tumanud Bagu et.al. (2019), kiwaa piipiro tantaman do Boros Kadazandusun id timpu dumontol. Koiso nopo nga’, tantaman id aspek sistom ija’an kawaawagu. Osiliu o’ tantaman itu tu’ ogumu subentik id suang etnik Dusunik. Kopogisuayan diti kopogowit do pomusarahan di misuai. Haro subentik i monorimo pimato “e” sabaagi pimato Boros Kadazandusun om haro ii manahak pomusarahan do pimato “e” nopo nga’ pimato noolos. Mantad dii, sistom kawaawagu diti osiliu do tantaman kumaa Boros Kadazandusun.

            Koduo, id aspek poristilahan. Poristilahan nopo nga’ kitonggungan do momili boros boros i kosudong montok toinsanan dialek Dusunik om posuangon sabaagi istila id Boros Kadazandusun. Apagon do momili isitila diti tu’ tumanud di Pugh-Kitingan (2016), haro 13 kawo boros i pointias id labus kakadaian, koibutan, om kotonobon Sabah miagal ii okito id peta 1.  Poomitanan, isitila abagos i kirati do tulun di mingoos id isoiso kalaja. Nung id dialek suai nopo nga’ roitan do “opori”. Nung momoguno do istila “opori” diti haro po kagu ii au kotorimo tu’ kirati nogi’ o opori do “manakau”. Haro nogi’ istila i kopogowit rati di miagal do “lamin” om “walai”, “baang” om “bawang”, “tungku” om “rogon”, om ogumu po. Mantad dii, okito do peristilahan nopo nga’ iso tantaman do Boros Kadazandusun id timpu dumontol tu’ haro lobi’ 30 subentik id suang do etnik Dusunik ogumu pisuayan.

Peta 1: Sasadan Booyungan Boros Dusunik

Tadon: Pugh-Kitingan (2016)

            Kotolu, tantaman nopo do Boros Kadazandusun nga’ id aspek status Boros Kadazandusun sabaagi Boros Wagu tu’ au kopio intangan do tulun ginumuan. Id pomusarahan diolo Boros Kadazandusun nopo nga’ au kopio oponsol. Orohian tulun baino do mongilo om momoguno boros di nointutunan om nokoingkawas miagal do boros ingilis, boros sina, om suuusuai po. Mantad dii, molohing nopo do baino nga’ popotosol tangaanak diolo do mingsingilo boros suai gisom adaan om olihuan boros sandad toi ko’ boros tina diolo sondii. Tumanud di Maxsimus Ongkili miagal i okito id gambal 10, agayo tonggungan molohing montok kotilombusan boros tina maya kopomogunaan boros sandad id pibarasan tikid tadau. Goos nopo diti nga’ montok manamong boros sandad moi do au atalub id pomogunan. Id nopo dilaid nga’ ia’on Boros Kadazandusun id labus do timpu pongia’an. Sundung po ingkaa, baino notorimo nodi o’ Boros Kadazandusun sabaagi subjek ii ia’on id suang proses pongia’an om pambalajaran nga’ sabaagi pongia’an boros koduo podii, sundung ii mingsingilo nopo nga’ tinaru Kadadazan Dusun.

Gambar 11: Suat abal kokomoi tonggungan molohing montok manamong boros KDMR

Tadon: https://bit.ly/3zmKwxf

 

            Kaapat, tantaman nopo ii otoguang do Boros Kadazandusun id timpu dumontol nga’ okuri tulun tanga’abal kokomoi boros diti sokiro au no atamangan. Kotinanan nopo i momolodi’ kopio do tulun angabaal diti nga’ mantad IPG, UPSI om UMS. Tumanud di Bagu et.al. (2021) iso nopo laang do momolodi’ tulun ii abaal kokomoi boros Kadazandusun nga’ maya pinludaan mongingia’ id IPG. Sundung po ingkaa, haro toun dii au maganu o’ IPGM do pogonuan mokiikinobos BKD id IPG miagal ii okito id suat abal digital id gambar 8. Kaantakan diti nopo nga’ kopogowit iso bagas di araat kumaa koburuon Boros Kadazandusun id aspek koposiilan komoiboros, kodolinan om ogumu po tu’ okuri tulun tangaabaal kokomoi kopomoguna’an boros diti. 

Gambar 12: Suat abal kokomoi kopogonuan mokiikinobos BKD id IPG

Tadon: https://bit.ly/3zbFkvR

POMOLINGKUMAN

Boros nopo nga’ iso kakamot ii popointutun isoiso tinaru tu’ atagak nopo boros nga’ atagak nogi’ tinaru. Piomungan om goos do sosongulun toi ko’ kotinanan id pogun tokou kapanahak bagas di tagayo kumaa katamangan boros sandad. Maya do koburuon komoiboros om kodolinan do Boros Kadazandusun diti, alansan daa do koingkawas, koimogot om kotindohoi nodaa Boros Kadazandusun sabaagi iso boros di ointutunan om gunoon id taang sompomogunan ontok timpu dumontol.    

SUKUON

Buuk

Bagu, L., Hakim, A. L., Robin, H., Jiminit, J., Lojiun, M., Metha, M., Saimin, M., Falvian, O., & Saimun, S. (2019). Koburuon Boros Kadazandusun komoiboros om kodolinan (J. Gitom, Ed.). Institut Pendidikan Guru Kampus Kent.

Daulip, J, D. (2014). Komiboros Dictionary. Sabah Komik.

Kadazan Dusun Cultural Association. (2015). Kadazan Dusun Malay - English dictionary. KDCA.

Lasimbang, R. (2009). English-Malay-Kadazandusun beginner’s dictionary.

Pugh-Kitingan, J. (2016). Kadazan Dusun. Insitut Terjemah & Buku Malaysia Berhad.

Wuryantoro, A. (2018). Pengantar penerjemahan. Deepublish Publisher

 

Jurnal

Bagu, L., Abdullah, S. N., Bala, B., & Ling, J. W. K. (2021). Persediaan awal latihan guru Bahasa Kadazandusun di Institut Pendidikan Guru Malaysia (2011–2014): early preparation for training of the Kadazandusun Language teacher in Institute Pendidikan Guru Malaysia (2011-2014). Journal of Borneo Social Transformation Studies, 7(1), 65-85.

Suat Abal

Bernama. (2021, Oktober 17).  Ibu bapa main peranan penting pelihara bahasa KDMR – Ongkili. Astro Awani. https://www.astroawani.com/berita-malaysia/ibu-bapa-main-peranan-penting-pelihara-bahasa-kdmr-ongkili-325766

Berita Sabah. (2022, July 7). Jangan hentikan penawaran Bahasa Kadazandusun di IPG: Madius. Berita Sabah, Portal Bebas, Telus dan Progresif. https://beritasabah.com/tidak-pernah-dijelaskan-madius-mahu-jumlah-pungutan-hasil-tahunan-di-sabah-dibentangkan/

Sarabatin, M. A. (2022, November 13). IPG Kampus Kent kembangkan bahasa Kadazandusun ke Wikikamus. SABAHTAIM.https://www.sabahtaim.com/2022/11/ipg-kampus-kent-kembangkan-bahasa.html