1.0 Pogintutunan
Tumanud Samsudin et. al. (2018),
haro limo koulalaho tangaanak ponondulian di tagayo miagal okito id rajah 1, ii
kaampai no do ginua’ ginawo om kowowoyoon, sosial, kolidasan, kotoundaan balajar
om pongimpurian. Id boros Kadazandusun kobolingngkangan tangaanak ponondulian
milo boogion kumaa apat kawo i kaampai no do kobolingkangan monuat, mambasa’,
ija’an om komi. Sundung po ingka, tangaanak ponondulian diti okon ko
oluhoi id oinsanan mato balajalan nga’ haro piipiro no. Mantad dii,
kitonggungan o’ mongingia’ do monguhup mononduli do tangaanak diti moi
do osulimbang yolo id oinsanan mato balajalan.
Rajah 1: Koulalaho tangaanak ponondulian
2.0 Kowowoyoon tangaanak ponondulian om pounayan
nokuro tu minog ponondulian tanak dii.
Iso nopo do kowowoyoon ponondulian
ii nokito ku ontok praktikum koiso nga’ obintingayaman ii poinsuang id
koulalaho ginua’ ginawo om kowowoyoon. Kobolingkangan diti nopo nga’ kopionit
kumaa kobolingkangan mambasa’ tu’ otingayaman yolo moi id dumbangan
montok mambasa’. Suai ko ii, au kotunud kopomolombusan tanda
basa’ miagal do nadalaan kosiau mambasa’ do isoiso panandatan tu’
otingayaman yolo soira intangan do tambalut soira mambasa’ om
modosi pingirakan sokiro haro kolombusan di au kotunud. Mantad
kowowoyoon diti, au tangaanak kopinluda kopomoguna’an tanda basa’ di
otopot. Oponsol kopio do onuan ponondulian tangaanak diti tu’ soira aiso
kotumbayaan tinan, oloyo o’ koimogoton kabaalan mambasa’ diolo
tu’ au katama do mumbal. Tumanud di Syafitri et. al. (2019), kotumbayaan
tinan di ososong nopo nga’ iso romu ii koponguhup do koimogoton boros suai id
koposion tikid tadau. Suai ko ii, ogumu kabaalan di otoliban soira
modosi yolo do manahak komi, sisimbar om ponguhatan soira id suang
kalas.
Sumusuhut, kowowoyon ponondulian
i nokito ku nopo nga’ au apagon tumanud ponuhuan tu’ tangaanak di nadalaan
koporokis toi ko’ hiperaktif gisom do mimpanau om mingkasau tambalut
suai id kalas. Iti miagal i noboros di Iftitah (2022), do tangaanak hiperaktif nopo
nga’ tangaanak i au kaanu poirikau id tirikohon montok timpu di alaid,
au asanangan do kadaada om oruhai koudali fokus maso id kalas. Iso nopo
kobolingkangan do tangaanak diti nga’ okito id kabaalan monuat. Poomitanan,
ogumu boros di toliban soira papadalin om au kotunud o’ tanda basa’ i
dinalin tu’ sumikap yau momongo timbaba’ moi do kikosiwatan mangasau tambalut
suai. Katagadan nogi’ isio do tambalut tu’ kopingangau om ka’antob
kapadalanan pongi’an. Mantad dii, insoduan yau do tambalut suai tu’
roitan do ginkasau om gunsangal. Kowowoyon diti kosuang id koulalahon sosial do
ponondulian. Oponsol do onuan ponondulian tangaanak diti tu’ kowowoyon
diolo kapanahak bagas di taraat kumaa tangaanak suai om tinan disio sondii.
Poomitanan, bagas kumaa tinan sondii nopo nga’ miagal do au tangaanak
dii kaanu fokus id kalas om aiso tambalut tu’ minsodu ngawii ii tambalut
dau. Bagas montok tangaanak suai nopo nga’ atagak fokus tangaanak do minsingilo.
Suai ko mantad dii, haro
nogi’ piipiro tangaanak ii kikobolingkangan do tumounda toi ko’ fokus id
pongia’an. Kowowoyoon diti nogi’ kopionit kumaa kobolingkangan sosial id walai
tu’ tumanud ponorubungan ku miampai mongingia’ id sikul dii, haro
kobolingkangan id panganakan do tangaanak dii gisom do minsiriba sunduan
diolo do minsingilo. Poomitanan, molohing di asaru miodu, miniada molohing, om
haro nogi’ ii napatayan do molohing. Tumanud Taris et. al. (2013), agayo
tonggungan do panganakan toi ko’ molohing montok koimogoton kabaalan tangaanak
om kowowoyoon diolo id sikul. Mantad dii, oponsol kopio do onuan ponondulian o’
tangaanak diti okon ko id kaabalan mambasa’ om monuat diolo nga’ id
koulalaho sosial miagal do motivasi nogi’ tu’ soira id sikul, mongingia’ nopo
nga’ kitonggungan sabaagi molohing kumoduo montok tangaanak.
Suai ko ii, haro nogi’
kowowoyon tangaanak i au po nokotounda do minsingilo taang kabaalan di lobi’
kawas tu’ sundung pia do taang kolimo no nga’ au po ogirot kabaalan do monuat
om mambasa’ diolo. Poomitanan, tangaanak diti kikobolingkangan id
kabaalan monuat boros tumanud nuludan MSO. Montok kabaalan mambasa’ nopo nga’
mingkodtingkod soira popolombus isoiso panandatan. Iti nopo nga’
poinsuang id koulalahon kotoundaan balajar tu’ osiriba po taang
kaabalan do mambasa’ om monuat. Oponsol kopio do onuan ponondulian
o’ tangaanak diti moi do ogonop om ogirot toud kabaalan diolo tintod sumuang
taang pambalajalan di lobi’ kawas. Tumanud di Ahmad et. al.
(2021), oponsol do ogonop kotoundaan balajar sosongulun tangaanak
pogulu minsingilo kabaalan di lobi’ kawas.
Suai ko mantad dii, haro
nogi’ tangaanak di au kaanu popionit toilaan di nakatalib miampai toilaan ii
naanu mantad pongia’an tu’ au kopio diolo norotian toi ko’ notoliban o’ isoiso
toilaan dii. Sumusuhut, orutum nogi’ o’ kabaalan komi tangaanak soira au
abagalan toilaan kokomoi isoiso uhu’ i maan pibarasai id kalas. Iso nopo o’
tadon kobolingkangan diti nga’ noonong do kolidasan tangaanak dii araat.
Tumanud Samsudin et. al. (2018), iso nopo koulalaho i kapangantob
koimogoton kabalaalan tangaanak id pongia’an nga’, kolidasan om pongimpurian. Sokiro
do asaru sumakit o’ tangaanak dii, au yolo kotindapou id sikul gisom do kaantob
koimogoton kabaalan diolo id aspek pongimurian. Mantad dii, ogumu toilaan ii
iya’on id sikul otoliban diolo. Oponsol do maan onuai ponondulian o’ tangaanak diti
moi do au yolo aadan id pambalajalan om kaanu popionit toilaan nakatalib
miampai toilaan wagu sundung pia do haro kobolingkangan di au milo talaban.
Tohuri, kowowoyoon montok
tangaanak i kikobolingkangan id koulalaho pogimpurian nogi’. Iso nopo
kowowoyoon ii okito mantad tanak diti nga’ oluhoi do popisuai bontuk om
warana. Poomitanan, soira mongia’ o’ mongingia’ do nuludan panandatan
momoguno do kakamot ponguhup pongia’an miagal kad kiwarana om kibontuk montok kabaalan
monuat, apagon tangaanak mamarati pisuaian do romu warana om bontuk id
pongia’an dii. Mantad dii, minog pihulit-hulit do mongingia’ laang popisuai
kopomogunaan do kakamot kumaa tangaanak dii. Oponsol kopio do onuan ponondulian
tangaanak diti moi do kopoinsonong kapamadalanan pongia’an montok kaabalan suai
miagal do mambasa, monuat om komi tangaanak tu’ tumanud di Sajat et.
al. (2017), romu inus diti kaanu kopongunsub koimogoton kabaalan om
kapamagayat rahi’ minsingilo do tangaanak.
3.0 Pomolingkuman
Sabaagi pomolingkuman, agayo kopio
tonggungan songulun mongingia’ om molohing kumaa kopomolodian booyungan
Malaysia i angabaal om kitongunggan kumaa pogun, tongotulun, om tinan diolo
sondii. Tangaanak ii poinsuang id ponondulian nopo nga’ okon ko basug nga’
kikobolingkangan id piipiro koulalaho miagal do ginua’ ginawo om kowowoyoon,
sosial, kolidasan, kotoundaan balajar om pongimpurian. Sokiro nopo do
ointutunan kopio do mongingia’ o’ tangaanak diti om kaanu mogihum poginsamakan
dii koontok kikosiwatan yolo do sumiliu sosongulun di nabantug id pambalajalan
om koposion.
Sukuon
Ahmad,
N., Othman, S., Sabil, A. M., Mokhtar, M. M., Nawawi, M. A. M., & Hason, Z.
(2021). Pengaruh didik hibur dalam meningkatkan kesediaan belajar kemahiran
membaca bahasa melayu murid belum menguasai tahap pencapaian minimum. Asian
Journal of Civilizational Studies (AJOCS), 3(1), 45-57.
Iftitah, S. L. (2022). Upaya
guru dalam membimbing anak hiperaktif di TK PKK Tanjung Pademawu Pamekasan. Jurnal
Anak Usia Dini Holistik Integratif (AUDHI), 5(1), 15-22.
Sajat, N. M., &
Majid, M. A. (2017, February). Aplikasi seni dalam pendidikan bagi
perkhidmatan bimbingan dan kaunseling. In Joint International
Seminar.
Samsudin, N. H., Wahid, P. R. A., & Bukhari, N. A. M.
(2018). Pembelajaran Bahasa Kanak-kanak Pemulihan Khas: Siri Ilmiah
APM-ITBM. Malaysian Institute of Translation & Books.
Syafitri, A., Yundayani,
A., & Kusumajati, W. K. (2019, November). Hubungan antara kepercayaan
diri siswa terhadap kemampuan berbicara Bahasa Inggris. In Prosiding
Seminar Nasional Pendidikan STKIP Kusuma Negara.
Taris, R., & Hussin,
M. (2013). Sosioekonomi keluarga, motivasi ekstrinsik dan kebolehan membaca
murid pemulihan khas. SK Lelaki Jalan Batu, 50350.