1.0 Kopointutunan
Tinaru Kadazan Dusun nopo nga’ iso tinimungan i bobos
tagayo poingion id pogun Sabah. Ointutunan o tinaru diti do keunikan diolo id
ogumu aspek miagal do kaadat’adato, basaan, taakanon, karya sastara om ogumu
po. Sundung po ingkaa, tinaru diti narahung nogi’ kumaa tinaru suai. Korohungan
diti nopo nga’ haro positif om negatif dau. Ponuatan ilmia diti popointalang
kokomoi tolu elemen koubasanan tradisi tinaru Kadazan Dusun i narahung
koubasnan tinaru suai miagal Cina, India, Malayu om Barat.
2.0 Elemen koubasanan tradisi tinaru
Kadazan Dusun
Elemen koubasanan nopo nga’ sumuku do piipiro komponen
i popointalang kokomoi koubasanan isoiso tinaru. Oponsol o elemen koubasanan
montok mamarati om popoitalang poingkuro koulalaho isoiso tinaru id koposion
tikid tadau miagal id aspek kotumbayaan, pisasawaan, basaan, taakanon,
karamayan om ogumu po.
3.0 Rahung tinaru suai kumaa elemen
pisasawaan tinaru Kadazan Dusun
Rahung pisasawaan di koiso nopo nga’ mantad tinaru
Cina. Poomitanan, id karamayan pisasawaan haro timpu minum teh i tonudan mantad
tinaru cina om mantad tinaru Kadazan haro timpu miohon pinisi i ointutunan
sabaagi takano suwu toi ko’ suap kumaa tiso om iso id tadau pisasawaan.
Sumusuhut, haro nogi’ kotumbayaan do sokiro korongou tuni tombolog,
minog do simbanan toi ko’ padalanon pisasawaan di ontok timpu suai tu’ sokiro
au tonudon, kapanahak kaka koligaganan kumaa pisasawaan di. Sundung po ingka,
kogumuan tulun au no tumanud do kotumbayaan diti. Suai ko ii, soira haro
tanak, ngaran nopo diolo nuru tumanud ngaran Cina ponong tapa. Sundung po
ingka, ugama nopo do tanak dii nga’ tumanud nonggo i pillion di tanak. (Nevashiny Karuppiah
& Rosazman Hussin 2021)
Sumusuhut, rahung pisasawaan mantad tinaru Barat nopo nga’
okito id laang kapamakayan rasuk di lobi’ formal miagal do Ball Gown om Tuxedo.
Kosoruan nopo do rasuk i narahung mantad Barat diti gunoon ontok ababayan
pisasawan id gereja. Soira koguli mantad gereja, potilombuson karamayan
pisasawaan dii id walai do tondu om momoguno nondo kagu yolo do rasuk
tradisional tinaru Kadazan Dusun. Suai
ko mantad dii, tumanud di Pugh-Kitingan (2016), kohompit o bobolian
montok manahak kasagaan momoguno rinait di poimbida ontok pisasawaan dii. Soira
nokosuang o’ Barat om nokointutun ugama Kristian id Sabah, kogumuan nopo do
tinaru Kadazan Dusun nga’ haro nodi ugama om nalaanan nodi’ i rinait kumaa
sambayang kasagaan i polombuson do Father id gereja.
3.1 Rahung tinaru suai kumaa elemen taakanon
tinaru Kadazan Dusun
Tumanud di Halina Sendera Mohd Yakin et al. (2020) taakanon tradisional
tinaru Kadazan Dusun nopo nga’ miagal do hinava, pinaasakan, sup lihing manuk,
bosou, bambangan, om tuhau. Sundung po ingka, soira nokosuang tinaru suai id
Sabah noruhangan nodi o’ kawo taakanon diti. Koiso nopo nga intangan tokou rahung do tinaru India
kumaa taakanon tinaru Kadazan Dusun id Sabah. Tumanud di Yumetri Abidin (2020),
rahung nopo India kumaa taakanon nga’ okito id aspek kopomogunaan kari id suang
taakanon toi ko’ rapaon. Sabaagi poomitanan, mogonsok o’ tinaru Kadazan Dusun
do manuk, sada, om sapi momoguno do kari. Rapaon i haro kopomogunaan kari okito
nogi’ id kogumuan karamaian toi ko’ abaabayan tinaru Kadazan Dusun id Sabah
miagal do tadau pisasawaan, tadau kinosusuon, kaamatan, mogitatabang om ogumu
po.
Kumoduo,
rahung tinaru Cina kumaa taakanon tinaru Sabah. Soira mongoi id kadai
pangakanan, tinaru Kadazan Dusun nga’ popotounda nodi ngawi taakanon miagal do pau,
dim sum, siomai om ogumu po. Suai ko ii, laang mangakan do
taakanon diti nga’ misuai nogi’ mantad tinaru Kadazan Dusun. Poomitanan,
kosoruan tinaru Cina nga’ momoguno sumpit do makan.
Kotolu,
rahung tinaru Malayu kumaa taakanon id tinaru Sabah. Poomitanan, rahung nasi
lemak id tinaru Kadazan Dusun. Taakanon nopo diti nga’ iso mantad taakanon
i asaru okito id nonggo nopo kadai pangakanan, pasar, pasar malam
om padagangon id disan do ralan. Tumanud
di Angeline
Soh et al. (2021) nasi lemak
nopo nga’ ointutunan do taakanon tradisional poimbida Malayu. Suai ko
ii, okito nogi’ o nasi lemak id pogun suai miagal Singapura om Brunei
i popokito do taakanon nopo diti nga’ iso taakanon di ointutunan om korohian do
ginumuan kohompit no do tinaru tokou.
3.2 Rahung tinaru suai kumaa elemen kotumbayaan
tinaru Kadazan Dusun
Kotumbayaan tinaru
Kadazan Dusun id Sabah dilaid nopo nga’ animisme. Nosimbanan toi ko’
narahung o’ kotumbayaan diti soira nokorikot tinaru Barat id pogun
Sabah. Poomitanan, kogumuan tinaru Sabah haro nodi ugama miagal do Kristian om
Silam. Tumanud di Afiratul Adawiyah Dulkarim & Siti Aidah Lukin (2020); Mohd
Nur Hidayat Hasbollah Hajimin et al. (2022), nokoburu o’ ugama Kristian soira
nokosuang mubaligh sompomogunan id Sabah. Suai ko ii, okito nogi’ rahung Barat kumaa kotumbayaan
tinaru Kadazan Dusun id aspek kapatayon. Tumanud di Pugh-Kitingan
(2016), sokiro Kristian nopo i tiagak nga’ owiton po mongoi id gereja montok
kapantangan di tohuri no. Soira opongo ii, owiton no kagu muli id walai om maan
nondo polisoko toi ko’ lobongo. Minog do oinsanan di nokorikot tumanud di
tiagak kumaa id pangalabangan. Kosoruan nopo do pangalabangan diti nga’ maso
pitangadau.
Koduo, tumanud di Mohammad Firdaus
Hasmin (2022), soira nokosuang ugama Silam id Sabah ontok abad ko-15 Masihi
maya mogot-logot, nokounsub tinaru Kadazan Dusun do sumuang ugama Silam.
Korikatan ugama Silam diti nakarahung toi ko’ nakapanahak bagas kumaa kotumbayaan
sogit id Sabah. Poomitanan, montok sogit id isoiso kinoyonon minog do haro
bobolian i kotonggungan do mongorot sogit sokiro haro kaantakan di au osonong
toi ko’ montok isoiso upacara. Sundung po ingka, soira nokosuang o’ ugama Silam
id Sabah nosimbanan nodi sogit diti momoguno sambayang i polombuson do
imam kampung, ustad toi ko’ tulun i kiugama Silam.
4.0
Pomolingkuman
Sabaagi
pomolingkuman, rahung elemen koubasanan mantad tinaru suai kapanahak bagas toi
ko’ kounalan di tagayo kumaa tinaru Kadazan Dusun montok popoingkawas tinaru,
mamarati pomogunan di lobi laab, manahak kosiwatan kumaa tinaru tokou do mumang
buru om sumiliu tinaru di lobi sonong.