UHU’: BOROS MOLOHING
SINUAT: FREDE ADRIE SABINOS
“Atang kaino makan!” kaa di ama minomolohou doho. “Bah…mintuhun oku no ama,
mooi oku no akan ti” kangku sinumimbar om intuhun oku no minongoi hilo id
dompuran tu’ hiri ngawi no i sampaganakan ku. Pogulu po makan, sumambayang
po yahai mongunsikou minamangun montok taakanon i pogiilangan dahai dii.
Yoku i Atang Muri poinsikul id sikul tosiriba Sungai Labuk, toun kaapat.
Tama ku nopo nga kingaran do Santi om tapa ku nopo nga i Muri. Kiwaa apat
yahai mogiadi-adi, i taka’ ku, tabang ku, yoho om songulun tadi ku tondu.
Asagau oku no makan mulong pia okoro o kinoulunon ku. “Adi…kada’an nu ilo
sangop? Hiti akano’ ku” kangku nokokito di tadi ku pinopoinsodu i sangop
mantad di takano dau. “Ho..au oku orohian mangakan sangop, aiso maro au
asiu. Nahh...akano’ ti” kaa dau sinumimbar. Igitai ku i sorungung(mangkuk)
ku om ngoyo ku i sangop. Osiau oku no minagawi i sangop tu orohian oku gia
mangakan.
Kokoko’ookkk!
Moningkukuuk ilo manuk dongkosuabon momosik doho. “Atang kaino mongoi
indahu” kaa di tama ku minagangat doho. Amu oku sinumimbar tu siodop oku po
gia om au daa asaga tumungag. “Posik kopio!” kaa di tapa tinumogod tu aiso
gia o simbar ku. Tungag oku nopo nakagagang napalakan rolou di apa’ opuhod
kopio om intuhun oku no minongoi amung diolo. Akan oku po om panampakai oku
do rasuk di koubasan ku mooi indahu’. “Honggo no kaka ngoyon dati indohu’ai
baino ama?” kangku minonguhot di ama tu’ suai o ralan i gunoon dahai diri.
“Mongoi tokou ompuya’ i luong tokou ponong hilo siba baino, nokoua’ no kanto
i luong dii” kaa di ama. “Sorohon no ralan panahon tokou kio, amu kou moti
kotunud muli” kaa di apa pinoposorou dahai. Ii nopo i tinumanud do mindahu
nga i tabang ku, yoho om i tadi ku. Hiri kaka walai i taka’ ku tu manamong o
walai do momodoropi kakamot. “Kada kooris apa’, amu oku i apalid iti” kangku
minboros miampai akawas ginawo sinumimbar. “Kada pimboros agal ino oi Atang,
au moti oilaan isai korongou dilo boros nu ndo” kaa di ama minongodu doho
nga amu oku i tinumomboyo’ tu’ kodou tulu oku gia.
Korikot
yahai hilo id dumo, tilombus oku minongoi timpak do tuod do kayu om impa’o
ku posorili. “Kuhh…olumis no ti konoyonon, ogumu nogi di luong pointanom”
kaa ginawo ku asanangan tomod soira nokorikot id dumo dii. Tilombusai dahai
mamanau gisom korikot id iso’ sulap tokoro nga olumis o pinomonsoi. Poiliho’
ku o barait i binabo ku kisuang do kokoriu ya, ongoyo di ama om potimpako’
dau i kokoriu hilo id sawat mooi do au korikot i tasu mooi pangakan. “Kaino
mongoi pongupu’ luong, au po alasu ilo tadau” kaa di apa’ minangangat dahai.
“baaa...kaino no” kaa dahai tolu-tolu do sinumimbar miampai ginawo di otood.
Kongingis i ama nokokito rabas dahai di otood kopio. Owito ku i barait ku om
tanud oku no di apa’. “Atuk…angagayo ti luong oi!” kaa di tabang ku
nakagagang miampai poingigit songinan luong. “Tinumunda kopio ilo luong
baino” kaa di apa’ ku sinumimbar miampai longon dau poinroloi no mongupu
luong. “Kaino milumbo, isai tosiau mongupu’ luong yau abantug” kangku om
timpuun no yahai mongupu gisom noponu o barait om wakid dahai.
“Naaa…yoho
nabantung, naala’ kou” kaa di tabang ku miampai tirak di topuhod. “Sehh…amu
oku gia minonotos bo” kangku minanahak o sisimbar miampai ginawo di au
otoronong. “Manu oku daa kamanang nga i tabang nogi nokopogulu” kaa ginawo
ku. “ula no, kada kou pogiuhod do hiti. Au osonong irad indo” kaa di ama
minogodu doho nga kakal po poinlasu’ ginawoku tu naala’ oku gia. Soira
nokopongupu’, owito’ no dahai i luong kinuma’a id sulap. Awagatan nodaa
yahai nga agaras o tinan dahai mamabo i loung dii gisom korikot id sulap. Id
sulap, ngoyo no kawagu i ama’ polintuhuno’ i kokoriu dahai tu pitangaadau no
tintod dii om osuatan no makan. Pogulu po makan, sumambayang po yahai om i
apa’ o minomuruan dahai do sumambayang monongkotoluod do minamangun. Maso do
makan, mogiilang yahai do takano om tikanas nopo dahai nga sada noosin
pinaga do kolopis om bosou sinamayan do tiniwak punti. Asagau tomod yahai do
makan om agayo o babol ku maamaso minangakan do takano pinorolot do
bosou.
Kopongo
do makan, undorong podii yahai id sulap di tu’ nowiyau do takanon om maamaso
magandad do kosonod o nakan. Latan oku no toruhai om koodop oku no. Au ku
nasadaran do alaalaid oku no nokoodop. “Atang kaino muli, sumodop no tadau”
kaa di ama. “Aii…om honggo yo tabang om i adi” kaa tuhot ku tu’ au oku
kokito diolo. “Nokopogulu no yolo tinumanud i apa’, kaino no, asadapan tokou
kopio” kaa di ama sinumimbar. Ingkakat oku no om bobo’o ku i barait ku
sinuangan do luong di noupu dahai di kosuab po. Pamanau oku no tinumanud di
ama do mindalan muli. Intangai ku tawan nga oruhai no sumodop. Songuni-uni
po tombolog om songongi id kinoyonon dii. “Kaino lampasai tokou laang
mamanau, sumodop no moti pama” kaa boros di ama tintod mamanau ya. Maamaso
do mindalan, sikog kaa om opurimanan ku do mamangwagat o barait ku.
Moyo-loyo di tapanau ku tu’ ohuyan oku di mamabo diti barait kisuang do
luong. Intangai ku i ama nga modu-sodu tu osiau o lampas dau mamanau. “Atuk
om oiduan oku ti pama ti nung oloyo oku no kopio” kaa ginawo ku. Umbalai ku
daa mingkosup di ama nga amu oku i kogusa tu okoro gia o lampas gakod ku om
awagat po kawagu ilo barait ku. “Ama andado’ oku!” kangku minomolohou di ama
nga au no nokorongou i ama. Au no laid nga koiduai oku no diolo om
osongulunan oku di mamanau. Intangai ku kawagu ilo tawan nga osodop no om
mosi-rosi oku di mamanau mindalan. Suai po au nodii okito kopio ralan om au
ku po kawagu kosorou wayaan do muli tu’ baino nogi nakawaya do ralan dii.
Modosi tomod oku di tu napalid oku di id tanga do puru. “Ama apa, hinonggo
kou? Modosi oku” kangku minomolohou diolo nga aiso no sisimbar norongou ku.
Ihad oku nopo di tu norosian tomod. “Kada kooris apa’, au oku i apalid iti”.
Kosorou oku i boros ku di kosuab po om kotumbaya’ai oku no kopio boros i ama
do “kada pimboros agal dii tu’ au oilaan isai o korongou” kaa. “Ama otopot i
pama boros nu dii. Napalid oku di kopio. Ama andado oku, modosi oku” kangku
miampai tihad di opuhod om irikau oku minungkodom.
“Atuk…Atang
nokuro ko?” kaa di tabang minonguhot doho. Ungkalat oku nga hiri i tabang ku
id doguang doho. Silikai ku posorili nga kagagang oku tu’ hiri oku po sulap
miampai diolo. Ihad oku nopo om ongoi oku gapus di ama ku. “Ama, siou tu amu
oku tinumomboyo boros nu” kangku di ama. Mantad dii, tumomboyo oku di kasari
boros di ama tu modosi oku no kopio nung apalid oku no id puru.